 |
|
|
 Rota > ABC Pontevedra
Algúns datos básicos
|
|
|
|
Pontevedra é unha cidade de 80.000 habitantes, capital da súa provincia (950.000 habitantes) homónima. Está situada no centro das Rías Baixas, en Galiza, mesmo na desembocadura do río Lérez, que a circunda para despois formar a Ría de Pontevedra.
Orixe
A orixe da cidade estivo sempre relacionado coa súa situación estratéxica, tanto nas primeiras vías romanas como posteriormente na rota medieval do Camiño Portugués a Compostela. As pontes son os elementos máis significativos da historia da cidade, tanto a do Burgo, na capital, como a de Ponte Sampaio, no sur.
Poboación e parroquias
A maior parte da poboación municipal vive no centro urbano, se ben unha parte importante está distribuida polas 15 parroquias que a circundan, duas delas mirando á ría de Vigo, no sur: Ponte Sampaio e Canicouva. No norte están as parroquias de Campañó, Alba, Cerponzóns, Verducido, Santa María e San André de Xeve, ademáis de Lérez, prácticamente inserida no centro urbano.
Cara ao leste atópanse Mourente, Bora e Marcón, e cara ao sur miran Tomeza, Salcedo e Lourizán.
Comarca
A cidade lidera un área comarcal de 121.000 habitantes, e é o centro de diversas iniciativas comarcais relacionadas coa planificación estratéxica, o desenvolvemento rural, a promoción do turismo, a xestión de augas, o transporte público, etc. Os concellos que forman parte da Área Territorial Urbana (ATUP) son Poio, Marín, Vilaboa e Pontevedra, aos que se unen Barro, Cotobade, Campolameiro, Pontecaldelas e A Lama para algunhas iniciativas conxuntas.
As comunicacións
A cidade atópase en pleno centro do Eixo Atlántico, entre os polos urbanos de Vigo e Vilagarcía. Está comunicada coa autoestrada AP9, que percorre Galiza de norte a sur e atópase a 30 km do aeroporto de Vigo e a 60 do de Santiago. Por mar comunícase a través do Porto de Marín Pontevedra, situado a 3 km do centro urbano e das principais vías de comunicación.
A cidade galega que máis medra
Desde 1999, Pontevedra medra en poboación unha media de perto de 1.000 persoas por ano, e é a primeira cidade galega en crecemento. Normalmente, a cidade ofrece a taxa de desemprego urbano máis baixa de Galiza, a poboación urbana máis nova de Galiza, a taxa de cidadáns urbanos que menos emigran do país e o maior índice de natalidade urbana.
|
|
|
Hoxe é 19.03.2010 | webmaster@pontevedra.eu | Páxina editada o 27.09.2009 polo Concello de Pontevedra. |
|
|
