 |
|
|
 Rota >
Saudo
|
|
|
|
Pontevedra é unha cidade feita á medida das persoas.
A nosa orixe é unha cuestión discutida polos historiadores e soterrada nos estratos e misterios do tempo. Parece claro que xurdimos e crecemos a partires da vila romana construída na cabeceira da ponte do Burgo. Grazas a elo hoxe podemos ofrecer ó visitante un conxunto histórico artístico composto por máis de 700 edificacións civís entre as que sobresaen fermosos pazos e tamén por relevantes monumentos relixiosos.
Pontevedra é unha cidade acolledora e aberta, que aposta polo turismo, e que ofrece a cordialidade das súas xentes e unha paisaxe marcada pola simbiose entre a terra e augas doces e salgadas, coa ría como nai e orixe de todo.
Pontevedra é tamén unha cidade orgullosa do seu pasado. Fomos a maior urbe galega cando do porto das Corbaceiras saía o viño do Ribeiro e os lagares de saín (aceite de sardiña) traballaban arreo. Fomos terra do pirata Benito Soto e mesmo competimos como berce de Cristóbal Colón, non en van aquí se construíu a carabela Santa María.
Somos, en fin, unha cidade de presente, próspera, coqueta e chea de oportunidades. Así nos asomamos a esta xanela global que é a Internet. Por iso ós pontevedreses, que temos sangue mariñeiro, gústanos mirar sempre ó horizonte, ó futuro.
|
|
|
Hoxe é 20.03.2010 | webmaster@pontevedra.eu | Páxina editada o 06.05.2008 polo Concello de Pontevedra. |
|
|
