A Concellería de Deportes e a Sociedade Ximnástica impulsarán un circuíto atlético anual en Pontevedra

Agustín Fernández anunciou que a súa intención, a pesar do pequeno recorte que vai haber no orzamento do Instituto Municipal de Deportes, pasa por manter as subvencións aos clubs, así como continuar coas distintas colaboracións en conceptos de tipo loxístico.
O concelleiro admitiu as reivindicacións da Ximnástica, nas que se apela á importancia do club, tanto pola súa participación nunha competición de rango nacional na máxima categoría do atletismo, como pola actividade social que xera e desempeña ao longo do ano. Ningún club, recalcouse, é quen de reunir na rúa a máis de mil persoas practicando deporte, como vai suceder este domingo coa media maratón, nin máis de 2.000 persoas, como ocorre coa San Silvestre.
Ambas partes quedaron en comezar a deseñar un calendario de carreiras populares para o ano próximo. Estaría integrado por entre cinco e seis probas, distribuídas ao longo da anualidade, e que contarían con un regulamento. Habería unha inscrición única e estudarase a posibilidade de integrar algunha das probas que xa se organizan no municipio por distintas entidades, pero apostando sempre pola calidade. O circuíto traería como novidades unha nova carreira en Monte Porreiro e un 10.000 polo centro urbano. Quedaría á marxe a San Silvestre, co obxectivo de preservar o seu carácter lúdico e de celebración da Fin de Ano. A iniciativa irá madurando nas próximas semanas e presentarase cando estea completamente pechada.