Localizan un posíbel petróglifo no muro de peche dunha casa en Salcedo

63

Un membro do equipo técnico que traballou ata fai unhas semanas na intervención arqueolóxica do Castro das Croas, dirixida pola empresa A Citania Arqueoloxía, e promovida polo Concello de Pontevedra, localizou fai uns días un posíbel petróglifo na parroquia de Salcedo, que está sendo estudado. No caso de que se confirme a súa orixe, solicitarase a súa catalogación.
Desgraciadamente, o gravado non se atopa in situ, senón na cara externa dun sillar do muro de peche da finca dunha casa no lugar de A Armada, na parroquia de Salcedo, no Concello de Pontevedra. Ademais está mutilado: trátase duns círculos concéntricos (unha cazoleta central con dous círculos concéntricos cortados pola metade) e sete cazoletas.
Segundo algúns veciños, a pedra coa que se construíu o muro pertencía á casa anterior que había nese lugar e que foi derribada para construír a nova, aproveitando a pedra para o muro de peche, do que se pode deducir que o petróglifo, probablemente, en orixe, era da propia parroquia de Salcedo.
Lukas Santiago, membro do equipo da intervención arqueolóxica do Castro das Croas nos traballos de campo de recollida da memoria oral, foi a persoa que atopou este posíbel petróglifo. O equipo técnico prosegue o traballo de campo unha vez rematada a intervención arqueolóxica, o que deu como resultado, entre outras cousas, deste achado.
A Dirección Xeral de Patrimonio Cultural da Xunta de Galicia e a Asociación de Veciños Heroes do Campo da Porta xa foron informados do atopado.