A páxina web do Concello ten colgada dende esta mañá a acta da última mesa de contratación do desdobramento da avenida de Vigo que propón como adxudicataria da obra a UTE de Covsa con E.C.Casas por valor de 4.156.000 euros. A UTE conseguiu 95 puntos, ao quedar fora da adxudicación á empresa Ferrovial xa que non xustificou debidamente -segundo a opinión dos técnicos- a oferta desmesurada que achegaba ao concurso.
A adxudicación será aprobada provisionalmente o vindeiro luns na Xunta de Goberno. Ademais dos 4.156.000 euros para a construcción do desdobramento da avenida de Vigo, a UTE oferta 1.160.000 euros en melloras para a reurbanización do primeiro tramo da avenida de Vigo, da avenida da Estación, a mellora do paso peonil entre a avenida da Estación e a avenida de Vigo, a continuidade da rúa Luís Seoane, a mellora dos servizos, así como completar a senda peonil do río Gafos.