Os sete últimos itinerarios de inserción laboral (cursos de formación, seguidos de prácticas tuteladas en empresas colaboradoras no Plan de Emprego Local) do programa municipal ILES comezan a principios deste mes de setembro. A Concellería de Promoción Económica ten todo listo e só falta por cubrir 16 prazas correspondentes aos cursos de monitores de actividades acuáticas.
Ata o próximo luns, nas oficinas do programa ILES en Ponte Muíños (Lourizán), admítense as solicitudes das persoas interesadas en participar nos cursos de Monitor de actividades acuáticas para persoas dependentes e Monitor de Natación Sincronizada. Hai oito vacantes en cada unha das especialidades. Os interesados deberán superar, ademais, dúas probas físicas consistentes en nadar 200 metros en menos de dous minutos e 30 segundos e “bucear”, sen apoio, unha distancia de 12 metros.
A concelleira de Promoción Económica, Carlota Román, anuncia o comezo de cinco itinerarios de inserción do ILES para o próximo luns, día 8. Serán os correspondentes ás especialidades de Auxiliar de Xeriatría, Atención especializada a enfermos de alzheimer, atención á infancia, Camareiro/a de pisos e Atención sociosanitaria a persoas no domicilio. Os dous relativos ás actividades acuáticas botarán a andar o próximo día 15. Cada curso ten unha capacidade de 15 persoas e unha duración de 365 horas.
A responsable municipal recalca que os alumnos/as do proxecto ILES perciben, ademais de formación e prácticas laborais, unha remuneración de 15 euros por cada xornada de asistencia, sempre que carezan de calquera outra prestación ou subsidio.
Os participantes, a excepción destas 16 prazas vacantes, xa están seleccionados a partir das listaxes remitidas polas oficinas do Servizo Galego de Colocación, único punto onde os candidatos/as puideron solicitar a súa inclusión nas listaxes. Carlota Román destacou durante a presentación desta última fase do programa municipal que isto supón un filtro de imparcialidade moi necesario nestes tempos. Queremos tratar aos parados sempre co máximo respecto e dicirlles que na Concellería de Promoción Económica a porta de entrada é o mesma para todos, recalcou.
Entre as cuestións que se valoraron para efectuar a selección final figuraba o empadroamento no concello de Pontevedra, non ter participado participado en edicións anteriores de ILES, o sexo feminino, seren menor de 30 anos ou maior de 45 anos, a pertenza a colectivos especiais, seren demandante de primeiro emprego, levar parado entre 2 e 5 anos ou máis de 5 anos, e, finalmente, o resultado dunha entrevista persoal.
O programa ILES, de duración trianual, está financiado polo Fondo Social Europeo. A Concellería de Promoción Económica aproveitou os bos resultados acadados durante estes tres anos, nos que superou un índice de inserción laboral superior ao 50%, para solicitar unha prórroga de seis meses, que foi concedida e permite agora afrontar esta última convocatoria. A andaina prolóngase así ata o 31 de decembro con 173.032 euros de novas achegas da Unión Europea, que foron complementadas con 43.258 euros da Concellería de Promoción Económica. As cifras finais do ILES chegan así a un investimento total de 1.579.419 euros, dos que o 80% corresponden aos fondos da Unión Europea e o resto ás achegas municipais.